Aðrir í sókn

Mér finnst skoðanakannanir alltaf áhugaverðar, get ekki að því gert.  Ég tók mig til og reiknaði skiptingu sæta ef niðurstaða kosninga yrði sú sem kemur fram í þessari könnun.  Byrjum á að gefa okkur að "aðrir" með sín 6,8% skiptist þannig á milli minni framboða að þau nái ekki manni inn:

• Framsóknarflokkurinn 9 þingmenn - óbreytt
• Sjálfstæðisflokkurinn 24 þingmenn - bæta við sig 8
• Samfylkingin 16 þingmenn - tapa 4
• VG 14 þingmenn - óbreytt á milli kosninga

Nú ef við gerumst örlítið skapandi og segjum að "aðrir" séu einn flokkur verður útkoman svona:

• Framsóknarflokkurinn 9 þingmenn - óbreytt
• Sjálfstæðisflokkurinn 23 þingmenn - bæta við sig 7
• Samfylkingin 14 þingmenn - tapa 6
• VG 13 þingmenn - tapa einum
• Aðrir fá 4 þingmenn

Ef við gerumst aðeins meira skapandi og færum þröskuld til úthlutunar úr 5% og niður í 4% gerist þetta:

• Framsóknarflokkurinn 9 þingmenn - óbreytt
• Sjálfstæðisflokkurinn 22 þingmenn - bæta við sig 6
• Samfylkingin 14 þingmenn - tapa 6
• VG 12 þingmenn - tapa 2
• Hreyfingin 2 þingmenn
• Aðrir fá 4 þingmenn

Svo minni ég fólk í lokinn á yfirlit yfir heimasíður stjórnmálasamtaka hér til hægri á síðunni og svo mína eigin könnun. 

 

Uppfært klukkan 22:25.  Villa gerð varðandi fylgi Samfylkingarinnar í útfærslu 2 og 3 þar sem fylgið var ekki minnkað úr 16 í 14 og rangt tekið fram hve marga Sjálfstæðisflokkur bætir við sig.

 

Litlar breytingar á fylgi flokka

Athugasemdir

[Baldur Hermannsson, 1.2.2011 kl. 20:46]

Sjálfstæðisflokkurinn er klárlega ekki að spjara sig í stjórnarandstöðunni. Fólkið sér ekki í honum það afl sem þarf til að rífa okkur upp úr ræfildómnum. Það er það eina sem áhugavert má teljast í þessari niðurstöðu.

[Axel Þór Kolbeinsson, 1.2.2011 kl. 20:56]

Þú getur huggað þig við það Baldur að Sjálfstæðisflokkurinn stendur sig þó betur en Framsókn sem nær ekki að bæta við sig neinu fylgi frá kosningum, dalað ef eitthvað er.  34,3% hjá Sjálfstæðisflokknum er þó komið í eðlilegt kjörfylgi flokksins, þótt það sé í lægri kantinum fyrir flokkinn.  Frá 1963 til 2007 ef undanskildar eru kosningarnar 1987 hefur fylgið verið frá 32,7% - 42,7%.

13,4% hjá Framsókn er lægra en öll önnur kosningaúrslit fyrir flokkinn ef frá eru taldar kosningarnar 2007. 

[Baldur Hermannsson, 1.2.2011 kl. 21:16]

Ég skil, en það gengur ekki að miða við meðalfylgi. Það er eðlilegt að flokkurinn dali þegar hann situr í ríkisstjórn en hann hefur alltaf vaxið í andstöðu....en ekki núna. Það er ills viti.

[Axel Þór Kolbeinsson, 1.2.2011 kl. 21:24]

Það fer náttúrulega eftir því hvaða fylgi miðað er við.  Flokkurinn hefur bætt við sig í kring um 10 prósentustig, sem er hátt í 50% fylgisaukning, frá síðustu kosningum.  Þannig að fylgið hefur skilað sér vel til baka og er komið á svipaðar slóðir og það var vorið 2008.

Mér finnst samt ekki líklegt að fylgi Sjálfstæðisflokksins fari mikið yfir 35% á næstu misserum. 

[Baldur Hermannsson, 1.2.2011 kl. 21:30]

Ekki með þessari áhöfn, svo mikið er ljóst.

[Axel Þór Kolbeinsson, 1.2.2011 kl. 21:37]

Leiðtogar flokksins eru ekkert sérstakir.  Konum á miðjum aldri finnst sumum Bjarni reyndar sætur, en það dugar ekki til.  Svo kemur venjulega hik á fólk þegar það reynir að muna nafn varafomannsins.

Pétur Blöndal er sá þingmaður Sjálfstæðisflokksins sem flestir elska, en því miður elska þeir að hata hann.