Þjóðfundur 2009

Ég var búinn að lofa fólki að skrifa aðeins um Þjóðfundinn og veru mína þar.

Ég var einn af 300 fulltrúum félagasamtaka og stofnana sem voru þátttakendur í þessum merka fundi, en Samtökum Fullveldissinna var boðið að senda einn fulltrúa og úr var að ég tæki það sæti.  Þegar ég mætti á staðinn var mikið af fólki komið.  Einhverjir einstaklingar voru fyrir utan með spjöld til að vekja athygli á málefnum sem þeim eru hugleikin.

Ég var mjög heppinn með borðfélaga mína og áttum við auðvelt að ná saman um mörg málefni og gátum varpað hugmyndum á milli okkar.  Að mörgu leiti hafði ég ákveðið forskot á aðra þátttakendur því í allt sumar og haust hef ég verið að vinna með félögum mínum úr hugmyndum og komast að sameiginlegri niðurstöðu.

Skipulagið utan um fundinn var mjög gott og eiga þeir einstaklingar sem unnu að fundinum mikið hrós skilið fyrir það.

Fljótlega bar á því að okkar borð skæri sig aðeins úr meðaltali fundarins því mikið af þeim gildum og flokkum sem við hentum fram komust ekki áfram.  Niðurstöður fundarins voru hálfgert moð úr hugmyndum fólks, en sýndi þó hver sameiginlegu gildi þjóðarinnar er, eða í það minnsta hvaða gildi fólk vill.

Það sem mér fannst vera verst við fundinn var hversu margir þingmenn tóku þátt.  Ég hefði ekki viljað sjá fleiri en einn úr hverjum flokki.

 

Athugasemdir

[17.11.2009 kl. 21:23]

Hvað áttu við með að ykkar gildi og flokkar kæmust ekki áfram??

[Axel Þór Kolbeinsson, 17.11.2009 kl. 21:33]

Hugmyndafræðin snerist um það að skrifa gildi á miða, t.d. heiðarleika, sanngirni o.sv.frv. og hver og einn gat svo sérstaklega merkt þau þrjú sem hann hafði helst í heiðri.  Síðan voru allir miðar af öllum borðum teknir saman og fundið út hver þeirra kom oftast fyrir.  Ýmis gildi sem voru ofarlega á blaði á okkar borði voru ekki meðal þeirra vinsælustu.

Næst var farið í að skrifa niður hugmyndir um framtíðina og setja þær í flokka sem hvert og eitt borð ákvað.  Eftir það voru tekin þeir átta flokkar sem oftast voru nefndir og gerðir að flokkum sem allir áttu að vinna með.  Þar voru flokkar sem við höfðum sett mikið í ekki í háu áliti hjá meðaltalinu.

[18.11.2009 kl. 21:43]

Og hvaða gildi og flokka voruð þið með sem ekki komust ofarlega hjá landanum??

[Axel Þór Kolbeinsson, 19.11.2009 kl. 10:34]

Einn stór flokkur var menningarmál.  Gildi sem ég man voru vinnusemi og útsjónarsemi.